నమ్మించి అత్యాచారం.. సాయం పేరుతో మరో ఘోరం.. ఒడిశాలో యువతి దారుణ హత్య

ఒడిశాలోని జగత్‌సింగ్‌పూర్ జిల్లాలో అత్యంత దారుణమైన ఘటన చోటుచేసుకుంది. 23 ఏళ్ల యువతిపై ఒకేరోజు ఇద్దరు వ్యక్తులు అత్యాచారానికి పాల్పడి, ఆపై ఆమెను హత్య చేశారు. నిందితుల్లో ఒకరు ఆమె ప్రియుడు కాగా, మరొకరు సాయం చేస్తానని నమ్మించిన అపరిచితుడు. ఈ దారుణ ఘటనకు సంబంధించి ఇద్దరు నిందితులను అరెస్ట్ చేసినట్లు పోలీసులు వెల్లడించారు. కిడ్నాప్, అత్యాచారం, హత్యకు సంబంధించిన సెక్షన్ల కింద వారిపై కేసు నమోదు చేశారు.

జగత్‌సింగ్‌పూర్ ఎస్పీ అంకిత్ కుమార్ వర్మ వెల్లడించిన వివరాల ప్రకారం... ఈ నెల‌ 22న ఈ దారుణం జరిగింది. బాధితురాలి ప్రియుడు పెళ్లి చేసుకుంటానని నమ్మించి, ఆలయానికి రమ్మని పిలిచాడు. అతనితో కలిసి వెళ్లేందుకు ఇంటి నుంచి బయలుదేరిన ఆమెను, అతను ఒక నిర్మానుష్య ప్రదేశానికి తీసుకెళ్లి అత్యాచారం చేసి, రహమా బస్టాండ్‌లో వదిలేసి వెళ్లిపోయాడు. బస్టాండ్‌లో నిస్సహాయ స్థితిలో ఉన్న యువతిని చూసిన ఝార్ఖండ్‌కు చెందిన మరో వ్యక్తి, పారాదీప్‌కు బైక్‌పై వెళ్తూ ఆమెకు సహాయం చేస్తానని నమ్మబలికాడు. అయితే, అతను ఆమెను పారాదీప్‌ పట్టణంలోని తాను అద్దెకు ఉంటున్న ఇంటి నాలుగో అంతస్తుపైకి తీసుకెళ్లి, మరోసారి అత్యాచారానికి పాల్పడ్డాడు. అనంతరం ఆమెను భవనం పైనుంచి కిందకు తోసేయడంతో అక్కడికక్కడే మృతి చెందింది. మరుసటి రోజు ఉదయం ఆమె మృతదేహాన్ని గుర్తించినట్లు ఎస్పీ తెలిపారు.

ఈ నెల‌ 22న సాయంత్రం యువతి ఇంటికి తిరిగి రాకపోవడంతో ఆమె సోదరుడు టిర్టోల్ పోలీస్ స్టేషన్‌లో మిస్సింగ్ కేసు పెట్టాడు. మరుసటి రోజు మృతదేహం లభ్యం కావడంతో అనుమానాస్పద మృతిగా కేసు నమోదు చేశారు. అనంతరం 25న తన సోదరిపై అత్యాచారం జరిపి హత్య చేశారని ఆరోపిస్తూ బాధితురాలి సోదరుడు పారాదీప్ మోడల్ పోలీస్ స్టేషన్‌లో ఫిర్యాదు చేశాడు. 

ఈ ఘటనపై బీజేడీ అధినేత, రాష్ట్ర శాసనసభ ప్రతిపక్ష నేత నవీన్ పట్నాయక్ తీవ్రంగా స్పందించారు. రాష్ట్రంలో శాంతిభద్రతల పరిస్థితిపై ఆయన ఆందోళన వ్యక్తం చేశారు. "ఇంకా ఎన్ని అమాయక ప్రాణాలు పోవాలి? పసిపిల్లల నుంచి దివ్యాంగుల వరకు ఎవరికీ భద్రత లేదు. రాష్ట్రంలో అసలు చట్టబద్ధమైన పాలన ఉందా?" అని ఆయన 'ఎక్స్‌'లో ప్రశ్నించారు. అంగుల్‌, సంబల్‌పూర్‌, పారాదీప్‌లలో జరుగుతున్న ఘోరమైన నేరాల వార్తలు తీవ్ర ఆందోళనకు గురిచేస్తున్నాయని అన్నారు. "మహిళల భద్రతపై ప్రభుత్వం సుదీర్ఘ ప్రసంగాలు ఇస్తుంటే, క్షేత్రస్థాయిలో పరిస్థితి అత్యంత ప్రమాదకరంగా ఉంది. ఇలాంటి ఘటనలు పదేపదే జరుగుతున్నా, ప్రభుత్వం కఠిన చర్యలు తీసుకోవడంలో విఫలమవడం నేరస్థులకు ధైర్యాన్నిస్తోంది" అని పట్నాయక్ విమర్శించారు. ప్రభుత్వం చొరవ చూపి శాంతిభద్రతలను కాపాడాలని ఆయన డిమాండ్ చేశారు.